Geschichten finden Geschichte suchen
Geschichten findenGeschichte suchen

Als kleine Kostprobe des in der ersten Ausgabe des "Holters" erschiene Geschichte von Anton Kleine:

Dai Täit bo iek dat Postken feuhert häewe!

Säit August 1953 was iek bäi däer Duitsken Bundespost beschäftiget. Als Postfacharbäer was mäin Job äistmool, in Niggenruer op däem Postamte Braifdriäer te säen. Läeter dann, imme Läuepe det Johres 1955, woor mi anbuen, bäi däer Post däen Autoführerschäin te maaken. Datt herre: Drai Wäeken Fahrschaule in Döertmen op Kosten däer Post. Noo bestoohener Prüfunge hewwe iek dann äestmol als Üerläuef- un Krankenväerträer imme Pakäetdenst arbäet, owwer äeuk all mol dat Landpöstken feuhert.

Landpöstken feuhern herre domols, vam Postamte Niggenruer üet dai do taugehöerigen Poststäen Küntrop, Hüerin, Gaabke, Früehlin, Balve, Mellen, Langenholtsen, Blintrop, Affeln, Ollenaffeln met Post, Pakäeten un watt sües no an postalisken Dingern no dotau gehoor, te versoargen. Düese Fahrten wooren am Dage twäimol tau däer sellwen Täit düerfeuhert. Et Moarens ümme 8,3o Üeher woohr äfffeuhert van Niggenruer tau däer Beliewerunge, Owends ümme 17,oo Üeher woohr äfffeuhert van Niggenruer ümme dai angenoamene Post afftehaalen. Dai Fahrwäeg was dann in däer Ümmegekohrten Sträecke.

Postkurve in Langenholthausen
Dat föer mäei sau ungewüehnlieke, owwer doch met däer Täeit intresante amme Landpöstken feuhern was, dat väi äeuk Persäeunen metnäehmen. Dai Platz imme Führerhäues was met fäef Sittepläetzen üetstattet. Dai Gäeste woeren van däer äinen Poststäee tau däer nächsten föer 2o Penninge metnoamen. Iek mat lüeter säeggen, iek denke gäerne an düese Täeit, fäei het düer dai Gäeste, dorunner vieele Stammgäeste, lüeter wat nigges hoert un Unnerhaltunge hatt. Söe was et taum Baispieele söe, datt Väertaindäegig äene Frau van Niggenruer tau äehren Döchtern, dai in mellen Verhäerotet wöern, feuhere. Aewensöe feuhere äinmol in däer Wäecke äine öllere Frau van Hüerin noo Langenholzen, ümme äehrer Dochter, dai doo verhäerotet is, te unnerstützen.

Schoine Dinger spieelern siek mangesten aff, wenn dann in Hüerin all fäef Gäeste instieegen wöern, un in Gaabke nöe faaker bitt tau sess Gäeste metfeuhern wollen. Wenn iek dann söe mäene Bedenken saggte, doch nit Alle metnäehmen te können, kräeg iek dann tau'r Antwoot:" Maak düe däene Aarbet, fäei regelt dat all unner ues", Iek mat säegggen, et is nie’ne Persöen nit metnoehmen woorn. Dai Gäeste näehmen siek giegensäetig op' en Schöet un stallten sieek op et Instäegepodest, söe dat lüeter Alle Platz harren un metfeuhern können.

Äenen ganz ungewüehnlikken Kunnen gaffte et van Küntrop no Niggenruer dat was Anna von Wrede, Se feuhere bolle jäeden Dag met ues. Se was lüeter unnerholtsam, nit räecht püenktlich,gaffte nit noo wenn et mol dorümme gäeng Se nit metnäenmen te können, wail et Pöstken te vull was. Jau Väi hätt Wreden Anna vöer Nöet äechen in däen Laderüem doen, ümme et Äehr nit'te verdäerwen. An äine scheuene "Eskapade met Frau von Wrede denke iek noch lüeter gäerne." Wreden Anna" büe se in Küntrop un äuek in äehrem gröeten Bekanntenkraise nannt woar, wass en bietken laate draane iek wass all imme Begriepe afftefeuhern. Do raip opaenmol de Frau Weyhers de Posthäelerske van Küntrop " Anton du musst warten, Anna kommt noch". Iek stäig wäer üet'me Auto, ümme Frau Wrede no mettenäehmen. Harre in Äile kam Se an te scheemeln, ümme Mäi dann te säeggen: "Ach düe olle dumme Käerl brüekes mi nit söe antekäeken, iek wäet selwes akk twäe Kläeer aane hewwe. Wenn Düe söau freuh kümmes, kann iek nit äes dat äine Kläed iütträekken." Mai fällt dann äuk op, datt dat unnere Kläid tiemlik 10 Zentimeter läenger was arre dat öewere, Äih könnt uch vöerstuellen bat dat vöeren Geläechter op däer Stroote, un imme Pöstken was. Jau söue schwelge iek van Dage noch in vieelen Äerinnerungen un denke gäerne an dai Joohre terügge, in däenen iek dat Pöstken feuhert häewwe,

Druckversion Druckversion | Sitemap
Historischer Verein "Quirinus"Langenholthausen e.V.